「你要記住...」
她握緊我另一個朋友嘅膊頭。
「唔好期望婚姻會令你哋嘅感情變好。」
就係一個晚上，一個朋友派帖一個朋友宣布離婚，世事真係原來可以咁岩🤦🏻♀️！三個女人一個墟咁就傾咗成晚。
呢一件事令我諗起一個男性朋友，佢同女朋友拍咗一年拖，但佢就越嚟越覺得同女朋友不能磨合有打算分手嘅念頭，女朋友sense到之後突然假扮懷孕迫男友同佢結婚...結局當然搞到好核突啦。又聽過有一對情侶察覺感情亮起紅燈，於是有一日男朋友突然抱咗隻狗返屋企，希望以養寵物嚟挽救同女友嘅感情，最後結果都係分手一團糟，而最慘係隻狗。
我更肯定呢個世界有人相信肉體係可以挽留愛情。
喺呢個以速食愛情為社會主流嘅年代，合則來不合則去，有時為咗得到愛情，好多人都會以金錢物質、社會大眾觀念(結婚生仔)甚至用肉體尊嚴去達到自己嘅目的。為咗得到”自己期待嘅結果”而堅持錯嘅選擇，值得嗎？
坦白講，當你察覺感情出現問題，其實唔多唔少你都知道部份原因，只係你自己怕去面對，因為你知道一攞出嚟傾只會有兩個結果：一係變得更了解對方，一係説散就散。一段感情出現問題絕對係兩個人嘅責任，可能係大家嘅價值觀越行越遠，成長速度越來越唔同，甚至其實從頭開始性格都已經唔夾而硬行黎去等等各種原因，係我哋每一個人都要去接受，絕對無話是但一方係冤枉，純粹係雙方能唔能夠用成年人成熟嘅態度去解決。 愛情唔能夠勉強大家都明白，但係喺某個時候，有啲人就扮未聽過，用各種方法期望感情變好。有人寧願選擇放棄自我，讓自己成為對方心目中嘅人嚟保住愛情，有人索性包容第三者嘅出現，更有人會用外在因素例如結婚去綁住對方。但係你試諗下，你/佢已經失愛，甚至大家都已經唔再愛對方，而你又夾硬搵啲理由要大家留低，係呢個狀態之下，你認為你死都唔放手嘅策略會有咩效果？你只在折磨大家。唔係話想逼你立即放棄，只係希望你諗通你唔敢分開嘅恐懼，你要有勇氣接受大家要分開嘅真正原因。要相信美好嘅愛情係呢個世上真係有，但只適用喺對的人身上。任何過分用力嘅愛情都係唔健康，出現問題就要勇敢面對佢。
當然你會話，作為局外人講就easy，拍拖就可以話散就散，但係去到已經談婚論嫁真係無咁容易。的確，成年人嘅世界有好多需要思量嘅地方。好難想像同某人相處十載，共同經歷好多低潮起伏，最後都係要面對分開嘅苦澀。但係走過嘅人都會話你聽，慶幸自己當時勇敢let go，然後再次好好撐起來，同時亦無放棄自己相信愛情，更期待下一次幸福嘅可能。
而我呢個好朋友佢真係做得到。
I am so proud of her。
#勇敢去面對問題吧
#共勉之
去IG探我:
Instagram.com/Missyboni
Search